| عشكَ صدفة هاك كَلبي الجان صبيرة براري يغزل ابخيط السراب وشاف بعيونك بحر وهاك روحي العاشرت ليل المحطة ومامش امودع يجيها ولامست چفك سفر وهاك اخذ ذني العجاف الالك عطشن حييييل عطشن وسنبلن ضيم وقهر وانت انت ياغيمة محنة تنثر بوجه الروازين الممحلة عيد وظنون ومطر ولك تدري اشكَد نطرتك؟؟ اشكَد بچيتك؟؟ اشكَد تمنيك مثل هلة كَمر اشكَد اناغي باسمك وليلي متاهة وانت مامش انت مامش حتى چلمة لاحرف بظنوني مر اشكَد ندهتك يامسيح ارويحتي بچفك خلاصي وانت تدرينها ابغيابك شلون تچويني سقر آه چم نشغة غريج الخذت ريتي وانت مامش لاجرف سبّاح لاكَشايه تتهاده بنهر انت مامش وك يمامش لاتجي بتسيوره ليلة لاحلم منك عبر وچنت اخافن والله اخافن وهم حبك وهم خصرك وهم عمري وهم يل مامش خبر *** ومن لكَيتك ملكَه غربة التعبوا ليل المسافة وللتنازل شال چفه ومن تلاكَوا يوم صدفه اتقاسموا شكبان همهم هاي مرت حيل سهلة وهاي كلفه وك من لكَيتك تاهت الروح اعله رمشك والرذاذ بجمر جرحي اعيون تبچي ادموع وسفه ومن شكيت ابحضن روحك كَتلك الوادم شحيحة فرهدوا عمري لصوانيهم شمع ما ليلة يطفه ومن طلبت لوحشتي شمعة ابغيابك ماشفت بس الكَباحة وعين صلفه وشيمتني اعله الصبر كَتلي الفرح غيمه مواسم مرة ضلعك يرجف ابليل المحطة ومرة يدفه ومن شكيت الحنظل ابطعم القصايد كَتلي هاي اشفافي غابة نخل برحي ارچي شفتك عالعثكَ خليها تغفه ورشفه رشفه آنه يل مفطوم عمري رضعتني ابطيب طيبك رشفه رشفه ولملمتلك احلى ماعندي سوالف وطرزت حزن القوافي وعلكَتها اباب جدمك چلمة ترفه وك ياجرح شوچ الورد فزز حنيني وسهّر الليل ابرضابك ياجرح ماريده يشفه شلون يشفه؟؟ وليش يشفه؟؟ ماشفت هيچي جرح بستان لهفه وك ياحبيبي آنه وانت نكتب التاريخ لليهوون صدفه ملكَه صدفه ودمع صدفه وعشكَ صدفه وانت صدفه وآنه احبك والله احبك والله يل ملكَاك صدفه |
| مؤيد محسن |